Espazos, temas e personaxes da Catedral de Compostela

As pinturas murais da Catedral de Santiago que sobreviviron ao paso dos séculos fálannos de devoción, mentalidade e unha xerarquización dos espazos sacros, así como dun cambio de concepción na tradición xacobea, o seu culto e imaxes.

As excavacións do século XX revelaron a base da torre medieval do Arcebispo Manrique, onde se achan vestixios de pintura mural coma este Anxo Músico que toca o órgano. Probablemente, formaba parte dunha composición dedicada á Virxe e o Neno que non se conserva.

Cando se desmontou o retablo renacentista (ca.1525) descubríronse, a ambos os dous lados da ventá románica, pinturas murais góticas que representan dous escudos, coroas rexias e flores de lis en alusión a Carlos V, patrón desta capela.

A partir dos anos vinte do século XVI, coa chegada do Renacemento, a catedral experimenta unha serie de cambios fundamentais. As pinturas murais conservadas desta época distribúense en diferentes capelas.

Na Capela de Sancti Spiritus, unha pintura ubicada onde estaba o altar de san Sebastián en época medieval representa unha Quinta Angustia, atribuída a Sixto de Frisia e Tristán de Taboada ou a Pedro de Más. O intradorso do arco decórase con elementos vexetais.

Na Capela de San Pedro ubícase un ciclo pictórico do s.XVI, atribuído a Jordan Gonçalvez, que amosa pasaxes da vida do santo coma a escena Domini, quo vadis?, ou a súa representación in Cátedra rodeada por dous grupos de figuras que aluden a personaxes da época.

Nos lunetos da Capela de San Fernando encóntranse dous frescos realizados en 1542 por Pedro Noble, destacado pintor renacentista. Neles preséntase a Ascensión de Cristo resucitado, envolto nunha nube; e a Asunción da Virxe, levada ao ceo por catro anxos.

As composicións de ambas as dúas escenas adáptanse ao marco arquitectónico, forzando algunhas posicións dos apóstolos e alongando as anatomías dun xeito moi avanzado, que casi anuncia o manierismo.

Nos séculos XVII e XVIII, as pinturas murais reflexan o impacto do Concilio de Trento, cun auxe da imaxe comprendida como ferramenta didáctica.

Sobre a bóveda da Biblioteca Capitular, disponse un ciclo xacobeo pintado por Manuel Arias Varela en 1780. Para exaltar o padroado do apóstolo Santiago, representa os principais episodios da súa vida: o seu Martirio, a súa aparición na Batalla de Clavijo e a súa Coroación.